佇教會外口的白話字文學──讀 Ài-lô-sian-kho〈我的學校生活的一段〉

Tī Kàu-hōe Gōa-káu ê Pe̍h-ōe-jī Bûn-ha̍k: Tha̍k Ài-lô-sian-kho " Góa Ha̍k-hāu Seng-hoa̍t ê Chi̍t Tōan-piàn""

 

留傳到taⁿ的白話字（pe̍h-ōe-jī；POJ）文學，我啲想，伊的功能可能本底就是佇教會內部宣傳教義。所以對我這種，kan-na對台語文學有興趣，soah對基督教無興趣的人來講，遐的mi̍h-kiāⁿ讀落到底tiāⁿ-tiāⁿ感覺無聊。

William Faulkner佇伊領受Nobel文學獎的演講中，是按呢講著文學的功能：

人類bē滅絕，並毋是因為人類佇萬物中央，有無限的官能；顛倒是因為人類有靈魂、有同情、有犧牲kap忍耐的精神。詩人，參作家的義務，就是欲寫遮的mi̍h-kiāⁿ，來予人類心靈得著提昇。¹

Ia̍h就是講，作一个作家，應該要深掘（chhim-khut）靈魂，寫出靈魂的鳥暗面kap nńg-chia̍h，因為心靈有遮的缺點，咱才會需要光明的力量來kah咱拯救。但是佇教會的白話字文學中，看bē著對心靈鳥暗的描寫kap深掘，無人會佇扑拚流汗了後，擱佇黑暗中孤單啲啼哭。因為到彼時，神的大恩典tō已經臨到。只要最後悔改，óa-khò主、o-ló上帝，tō會開始過快快樂樂幸幸福福的日子，無悲傷無痛苦。
這予我想著，日本無賴派文學家太宰治，佇伊的《人間失格》內底所講兮（--ê）：「 雖然內容án-ni講是無毋對，但人的心內應該有擱較歹理解、更較恐怖的代誌才對。」

會使講，佇教會的白話字文學中，無人生中的絕望kap悲哀的描寫，離真實的人生傷遠。嘛因為按呢，我一直無法度位教會的文學裡（--lìn），得著讀文學應該有的趣味。²

按呢來看，Ài-lô-sian-kho（V. Eroshenko；愛羅先珂）的小說"Góa Ha̍k-hāu Seng-hoa̍t ê Chi̍t Tōan-piàn"³（我的學校生活的一段片），就非常特殊。 Ài-lô-sian-kho是一个青瞑詩人，伊用伊佇矇童學校（bông-tông ha̍k-hāu）的經驗，來寫作這篇文。⁴佇這篇文裡，伊對著替權力phôo-lān-pha的先生，就是假讀冊人（華語叫作「偽知識份子」）攏用hiam-kì-kì的語言去kā in 消譴，讀了誠chhiò-khoe；但寫tio̍h無想欲攀附權力的良心，in心中悲哀的時陣，又擱寫kah予人感動。伊的藝術性，超過我所看過的任何白話字文章，所以我想欲替伊寫一篇導讀，希望會使予較濟的人讀tio̍h伊。

[[猶未完咧，續落去看第二篇]]



擱有，這篇小說，有台語文記憶的版本（第一篇就是）
嘛會使佇遮讀著（揣「廈語短篇小說」）。可是，伊第二章內文全無。

08.16.2011

Tī Bân-bân Lo̍k-liâu

1這段是翻寫自：佛克納（William Faulkner）著，諾貝爾文學獎全集編譯委員會譯，〈受獎演說〉，收錄佇《佛克納艾略特》諾貝爾文學獎全集27，（台北縣板橋：書華出版事業有限公司，1981），第378面。

2佇遮我不是講教會的白話字文學無價值，因為，若毋是教會留落來chiah濟的文獻予咱作參考，我想我到taⁿ可能揂無法度用台灣閩南語來寫mi̍h-kiāⁿ。嘛可能是我讀的傷少，若有前輩知影有佗一篇教會文學較重要、寫kah較好，若無棄嫌嘛請kā我講，誠lóo-la̍t。

3「生活」，寫作"seng-hoa̍t"，che毋是我扑字扑kah走鐘去喔，是腔口的問題。這篇小說是譯作廈門話，kah咱台灣通行的台灣閩南語（台語）有足濟無仝的所在。我ǹg-bāng有人會出力佮廈門話翻寫作台灣閩南語，予較濟人看。若是有時間，我嘛想欲kā伊翻譯作華語。

4我對這位Ài-lô-sian-kho誠有興趣，但查無伊擱有siáⁿ-mi̍h作品，佇小說結尾所在，有簡單的作者簡介，內面有寫著佇中國，捌有一位Oo Jú-chi（胡愈之[感謝回應告知]）翻譯過伊的作品，後來由Lóo Sìn（魯迅）編輯作一本《 Ài-lô-sian-kho中華集》。若有人有這本冊的消息，抑是知影有這位 Ài-lô-sian-kho的其它翻譯（華語、白話字攏好），抑是知影Ài-lô-sian-kho的生平的，攏請佮我講，大大感謝。