黑暗佮光明──讀 Ài-lô-sian-kho〈我的學校生活的一段〉⑵

[看第一篇]
愛羅先珂佇小說一開始，就自白講著，伊佇4歲的時陣就變作青盲人（tshenn-mê-lâng）。自此以後，伊變作一个「暝時的國的國民」。可是青盲這頂代載，對伊來講是好ia̍h是䆀，伊suah毋知，就造成了伏筆的效果。因為對咱一般人來看來，青盲代表著無健全，m̄-nā是生活上的不便，嘛表示伊的生存會tú-tio̍h濟濟困難，不管安怎講，青盲攏是悲慘的代誌。哪會使講是「好」咧？

原來佇這篇小說內底，青盲會使看作是一个暗喻。第一層的意義，是青盲人雖然看無mi̍h-kiānn，毋擱也因為安呢，in嘛看bē著世間的紛擾，反倒得著心靈的成長，這層意義親像有tām-poh-á神秘主義的氣味佇啲。

伊用美國自然科學家Hawks的例來講，Hawks嘛是一个青盲人，伊佇青盲了後，離開了「人的世界」，予伊的心無受著世間的汙染，會通得著平靜，看見「神的宇宙」（sîn ê u-tiū）、聽見星啲唱歌。Hawks離開人的世界，才瞭解自然的偉大。

這予我想著某一種讀冊人的理想形象，¹in佮世間掌權的人bē合，無想欲佮權力作伙仝流河汙，又兼無法度改變世界，就bih入去深山林內，不管安怎講，至少會使保持著良心的清白。這位Hawks，就予我想著這類的讀冊人。

可是若想欲作這種讀冊人，可能代先愛有bē䆀的家境才會使。像愛羅先珂，伊四界流浪佇世界各大都城中央，欲安怎理解著自然的偉大？為著生活，欲安怎bih入去深山林內？

毋擱青盲的烏暗，教伊另外一項代誌，這是青盲佇這篇小說內底的第二層意義：無看見權力，ia̍h bē-giàn kā kuân-le̍k tshap-siâu。掌權者啲講白賊的時陣，tiānn-tiānn tio̍h 攏有光明的理由。譬如講咱著愛尊敬掌權的人，若無，就是不敬。若準講掌權的人啲講話，咱聽著，就愛khiā起來。若毋khiā起來就愛sè-jī--ah，因為Kueh Sòo-tshun ē siūnn-beh tsàu kuè kā lí siàn tshùi-phué，koh ē kóng lín lāu-pē lāu-bú bē-hiáu kà-sī, sī ka-kàu bô hó。

掌權者參替in phô-lān-pha的人，講hâu-siâu話的時陣，攏介濟光明的理由，有的時陣，in愛共這種理由，號名叫作「理性」。但，青盲的烏暗，suah 會使tsha̍k破光明理性的大ke-kui。對讀冊人來講，這種無啲共權力tshap-siâu的烏暗力量，較文雅來講，叫作「骨氣」，是讀冊人上了不起的美德。

[猶未寫了，待續]

1華語的「知識份子」這个詞，佇台語內底，我較愛用「讀冊人」來表達。